Sa dinami-dami ng mga Koreano na nagsisiksikan sa mga dalampasigan ng Pilipinas, aakalain mong wala nito sa bansang Korea. Meron naman kaya lang ay hindi kasing gaganda na kagaya sa ating bansa at kalimitan ay hindi maliguan kung hindi panahon ng tag-araw dahil malamig ang tubig kung hindi.

Ang litrato sa ibaba ay kuha sa isang lugar na ang tawag ay Ammyeondo (gawing kanluran), mga dalawang oras mula sa Seoul. Pansinin na kung low tide ay pwedeng lakarin ang dalawang islang bato at kung high tide naman ay hindi na pwede. Ang ibang larawan ay mga lamang-dagat na mabibili sa dalampasigan mismo ng Ammyeondo. Sariwang-sariwa at kailangan lang ay maghanap ng malaking bato kung saan pwedeng umupo para kumain.

Napakasarap ng talaba na sinasawsaw sa “cho gochugang” na gawa sa sili. Hindi ko pa natikman ang sariwang pugita dahil takot ako na baka dumikit sa lalamunan at hindi ako makahinga. Napakalalaki ng mga tahong at ano ba ang tawag sa mahabang iyun? Dahil panahon na ng tag-araw, magbabakasyon kami nitong Linggo sa isang dalampasigan sa gawing silangan ng Korea. Siguradong pagkarami-raming tao!